Ronaldo kerkon largimin...??

Tuesday, September 4, 2012


Cristiano Ronaldo shënoi dy gola ndaj Granada në fitoren 3-0 të Real Madrid, por sulmuesi portugez nuk i festoi si përherë këto gola.
Pas ndeshjes, portugezi deklaroi për mediat spanjolle: “Jam i trishtuar dhe drejtuesit e klubit e dinë. Për këtë arsye nuk i festoj golat. Janë çështje profesionale. Nuk mund të them asgjë më shumë.”
Cristiano doli nga loja në minutën e 64 për një dëmtim dhe pasi ndenji 10 minuta në stol u largua në dhomat e zhveshjes pa pritur përfundimin e takimit.
Kur u pyet për arsyet e këtij trishtimi, portugezi deklaroi sërish se drejtuesit e dinë arsyen dhe kjo është më e rëndësishmja.
Sipas ‘AS’, sulmuesi është takuar ditën e shtunë me presidentin e klubit, Florentino Perez, duke i bërë të ditur edhe mundësinë e largimit nga merengues. Ronaldo nuk ndihet mirë me shokët e ekipit. Fillimisht është zhgënjyer nga Marcelo, shoku i tij i ngushtë, i cili ka mbështetur Casillas-in për çmimin Topi i Artë FIFA.
Gjithashtu marrëdhënia me lojtarët spanjollë të kampionëve në fuqi të Spanjës nuk është idealja.
Një tjetër arsye mendohet të jetë rinovimi i kontratës (i skadon në vitin 2015) dhe rritja e mëtejshme e pagës prej 10 milionë eurosh në sezon. Di Maria, Albiol dhe Arbeloa janë tre nga lojtarët që kanë rinovuar kontratat, ndërsa portugezi ende nuk ka marrë asnjë telefonatë.

Share this article on :
 
© Copyright 2011-2012 Gazeta Sot Online All Rights Reserved.